ਹਰਿਆਣਾ: ਹਰਿਆਣਾ (Haryana) ਨੂੰ ਭਾਰਤਮਾਲਾ ਪ੍ਰੋਜੈਕਟ ਦੇ ਤਹਿਤ 30 ਜੁਲਾਈ ਤੋਂ ਇੱਕ ਹੋਰ ਛੇ ਮਾਰਗੀ ਗ੍ਰੀਨਫੀਲਡ ਹਾਈਵੇ (Greenfield highway) ਮਿਲੇਗਾ। ਇਸ ਹਾਈਵੇਅ ‘ਤੇ 30 ਅਤੇ 31 ਜੁਲਾਈ ਨੂੰ ਟਰਾਇਲ ਹੋਵੇਗਾ। ਇਸ ਤੋਂ ਬਾਅਦ 1 ਅਗਸਤ 2022 ਤੋਂ ਇਸ ਹਾਈਵੇਅ ‘ਤੇ 4 ਥਾਵਾਂ ‘ਤੇ ਟੋਲ ਪਲਾਜ਼ਾ ਸ਼ੁਰੂ ਹੋ ਜਾਣਗੇ। ਇਸ ਹਾਈਵੇਅ ਰਾਹੀਂ ਹਰਿਆਣਾ ਦੇ 8 ਜ਼ਿਲ੍ਹਿਆਂ ਖਾਸ ਕਰਕੇ ਦੱਖਣੀ ਹਰਿਆਣਾ ਵਿੱਚ ਪੈਂਦੇ ਨਾਰਨੌਲ-ਮਹੇਂਦਰਗੜ੍ਹ ਅਤੇ ਭਿਵਾਨੀ ਨੂੰ ਚੰਡੀਗੜ੍ਹ ਨਾਲ ਸਿੱਧਾ ਸੰਪਰਕ ਮਿਲੇਗਾ।
ਟਰਾਂਸ ਹਰਿਆਣਾ ਗ੍ਰੀਨਫੀਲਡ ਪ੍ਰੋਜੈਕਟ ਤਹਿਤ ਬਣੇ ਇਸ 227 ਕਿਲੋਮੀਟਰ ਲੰਬੇ ਛੇ ਮਾਰਗੀ ਰਾਸ਼ਟਰੀ ਰਾਜ ਮਾਰਗ ਦਾ ਨਾਮ NH-152D ਹੈ। ਇਹ ਰਾਸ਼ਟਰੀ ਰਾਜਮਾਰਗ ਨਾਰਨੌਲ ਬਾਈਪਾਸ ਦੇ ਮੰਡੀ ਪਿੰਡ ਤੋਂ ਸ਼ੁਰੂ ਹੋ ਕੇ ਸਿੱਧਾ ਕੁਰੂਕਸ਼ੇਤਰ ਜ਼ਿਲ੍ਹੇ ਦੇ ਇਸਮਾਈਲਾਬਾਦ ਖੇਤਰ ਦੇ ਪਿੰਡ ਗੰਗੇੜੀ ਪਹੁੰਚੇਗਾ। ਅੰਬਾਲਾ-ਕੋਟਪੁਤਲੀ ਆਰਥਿਕ ਗਲਿਆਰੇ ਦੇ ਤਹਿਤ ਇਸ ਹਾਈਵੇਅ ਨੂੰ ਬਣਾਉਣ ਦਾ ਐਲਾਨ 2018 ਵਿੱਚ ਕੀਤਾ ਗਿਆ ਸੀ।
NHAI ਵੱਲੋਂ ਜਾਰੀ ਪੱਤਰ ਅਨੁਸਾਰ ਛੇ ਮਾਰਗੀ ਹਾਈਵੇਅ ਦਾ ਕੰਮ ਲਗਭਗ ਪੂਰਾ ਹੋ ਚੁੱਕਾ ਹੈ। 30 ਅਤੇ 31 ਜੁਲਾਈ ਤੱਕ ਇਸ ‘ਤੇ ਟਰਾਇਲ ਟਰੈਫਿਕ ਸ਼ੁਰੂ ਕੀਤਾ ਜਾਵੇਗਾ। ਇਸ ਤੋਂ ਬਾਅਦ 1 ਅਗਸਤ ਤੋਂ ਹਾਈਵੇਅ ‘ਤੇ ਟੋਲ ਵਸੂਲੀ ਕੀਤੀ ਜਾਵੇਗੀ। 227 ਕਿਲੋਮੀਟਰ ਲੰਬੇ ਇਸ ਹਾਈਵੇਅ ‘ਤੇ 4 ਟੋਲ ਬੂਥ ਬਣਾਏ ਗਏ ਹਨ। ਪਹਿਲਾ ਟੋਲ ਬੂਥ ਮਹਿੰਦਰਗੜ੍ਹ ਵਿੱਚ ਬਣਾਇਆ ਗਿਆ ਹੈ।
