62 ’ਚੋਂ 55 ਨਹੀਂ ਕਰ ਸਕੇ ਪੰਜਾਬੀ ਪਾਸ
ਪਟਿਆਲਾ: 10 ਮਾਰਚ ਨੂੰ ਹੋਈ ਪੰਜਾਬੀ ਪ੍ਰਬੋਧ ਪ੍ਰੀਖਿਆ ਦਾ ਨਤੀਜਾ ਐਲਾਨਿਆ ਗਿਆ ਹੈ ਜਿਸ ਵਿਚ 62 ਉਮੀਦਵਾਰਾਂ ਵਿਚੋਂ 55 ਫੇਲ੍ਹ ਹੋ ਗਏ ਹਨ। ਪੰਜਾਬੀ ਪ੍ਰਬੋਧ ਪ੍ਰੀਖਿਆ ਸਿਰਫ਼ ਉਹ ਉਮੀਦਵਾਰ ਹੀ ਦੇ ਸਕਦੇ ਹਨ ਜਿਨ੍ਹਾਂ ਨੇ ਪੰਜਾਬ ਸਰਕਾਰ ਦੀ ਕਿਸੇ ਆਸਾਮੀ ਲਈ ਅਪਲਾਈ ਕਰਨਾ ਹੋਵੇ। ਇਹ ਪ੍ਰੀਖਿਆ ਕਿਸੇ ਕਿਸਮ ਦੀ ਪੜ੍ਹਾਈ ਵਿਚ ਦਾਖ਼ਲਾ ਲੈਣ ਜਾਂ ਅਕਾਦਮਿਕ ਡਿਗਰੀ ਲੈਣ ਵਾਲੇ ਉਮੀਦਵਾਰ ਨਹੀਂ ਦੇ ਸਕਦੇ। 2022 ਵਿਚ ਇਸ ਪ੍ਰੀਖਿਆ ਲਈ ਦੋ ਪੇਪਰ ਲੈਣ ਦਾ ਫ਼ੈਸਲਾ ਕੀਤਾ ਗਿਆ ਹੈ। ਪ੍ਰੀਖਿਆ ਪਾਸ ਕਰਨ ਲਈ ਦੋਵੇਂ ਪੇਪਰ ਦੇਣੇ ਲਾਜ਼ਮੀ ਤੇ ਦੋਹਾਂ ਵਿਚੋਂ ਪਾਸ ਹੋਣਾ ਜ਼ਰੂਰੀ ਹੈ।
ਸਰਕਾਰ ਵੱਲੋਂ 2009 ਵਿਚ ਸਰਕਾਰੀ ਨੌਕਰੀ ਵਿਚ ਗਰੁੱਪ ਸੀ ਦੀ ਆਸਾਮੀ ਲਈ ਨਿਰਧਾਰਤ ਯੋਗਤਾ ਗ੍ਰੈਜੂਏਸ਼ਨ ਕੀਤੀ ਗਈ ਹੈ। ਪੰਜਾਬ ਰਾਜ ਵਿਚ ਨੌਕਰੀ ਕਰਨ ਲਈ ਪ੍ਰਸ਼ਾਸਨਿਕ ਜਾਂ ਦਫ਼ਤਰੀ ਕਾਰਜਾਂ ਲਈ ਪੰਜਾਬੀ ਲਾਜ਼ਮੀ ਹੈ। ਇਸ ਲਈ ਪੰਜਾਬੀ ਪ੍ਰਬੋਧ ਪ੍ਰੀਖਿਆ ਦੇਣ ਵਾਲੇ ਉਮੀਦਵਾਰ ਲਈ ਪ੍ਰੀਖਿਆ ਦੇਣ ਲਈ ਵੀ ਨਿਰਧਾਰਤ ਯੋਗਤਾ ਗ੍ਰੈਜੂਏਸ਼ਨ ਹੈ। ਜੇ ਪੰਜਾਬ ਸਰਕਾਰ ਦੀ ਕਿਸੇ ਗਰੁੱਪ ‘ਸੀ’ ਅਸਾਮੀ ਲਈ ਯੋਗਤਾ ਭਰਤੀ ਕਰਨ ਵਾਲੇ ਵਿਭਾਗ ਵੱਲੋਂ ਡਿਪਲੋਮਾ ਰੱਖੀ ਗਈ ਹੈ ਤਾਂ ਉਹ ਉਮੀਦਵਾਰ ਵੀ ਪੰਜਾਬ ਪ੍ਰਬੋਧ ਦੀ ਪ੍ਰੀਖਿਆ ਦੇ ਸਕਦਾ ਹੈ।
ਪੰਜਾਬ ਪ੍ਰਬੋਧ ਪ੍ਰੀਖਿਆ ਸਾਲ ਵਿਚ ਚਾਰ ਵਾਰ ਮਾਰਚ, ਜੂਨ, ਸਤੰਬਰ ਅਤੇ ਦਸੰਬਰ ਮਹੀਨਿਆਂ ਵਿਚ ਕਰਵਾਈ ਜਾਂਦੀ ਹੈ। ਇਸ ਤੋਂ ਇਲਾਵਾ ਵਿਸ਼ੇਸ਼ ਹਾਲਾਤ ਵਿਚ ਸਮਰੱਥ ਅਧਿਕਾਰੀ ਦੀ ਪ੍ਰਵਾਨਗੀ ਤੋਂ ਬਾਅਦ ਪ੍ਰੀਖਿਆ ਕਰਵਾਈ ਜਾ ਸਕਦੀ ਹੈ। ਇਹ ਪ੍ਰੀਖਿਆ ਪੰਜਾਬ ਵਿਚ ਸਰਕਾਰੀ ਆਸਾਮੀ ਲਈ ਪੰਜਾਬੀ ਦਾ ਗਿਆਨ ਰੱਖਣ ਲਈ ਨਿਰਧਾਰਤ ਕੀਤੀ ਗਈ ਹੈ। ਇਸ ਲਈ ਸਰਕਾਰੀ ਹਦਾਇਤਾਂ ਅਨੁਸਾਰ ਪੰਜਾਬੀ ਪ੍ਰਬੋਧ ਪ੍ਰੀਖਿਆ ਦੇਣ ਵਾਲੇ ਉਮੀਦਵਾਰ ਦੀ ਉਮਰ 18 ਤੋਂ 37 ਸਾਲ ਤੈਅ ਕੀਤੀ ਗਈ ਹੈ।