ਨਵੀਂ ਦਿੱਲੀ, ਦੁਨੀਆ ਦੀ ਪ੍ਰਮੁੱਖ ਈ-ਕਾਮਰਸ ਕੰਪਨੀ ਐਮਾਜ਼ਾਨ ਦੇ ਸੰਸਥਾਪਕ ਜੈਫ ਬੇਜੋਸ ਅਗਲੇ 12 ਮਹੀਨਿਆਂ ‘ਚ ਕੰਪਨੀ ਦੇ 50 ਮਿਲੀਅਨ (5 ਕਰੋੜ) ਸ਼ੇਅਰ ਵੇਚਣ ਦੀ ਯੋਜਨਾ ਬਣਾ ਰਹੇ ਹਨ। ਇਕ ਰਿਪੋਰਟ ਦੇ ਮੁਤਾਬਕ 171.8 ਡਾਲਰ ਪ੍ਰਤੀ ਸ਼ੇਅਰ ਦੀ ਮੌਜੂਦਾ ਕੀਮਤ ‘ਤੇ ਇਨ੍ਹਾਂ ਐਮਾਜ਼ਾਨ ਸ਼ੇਅਰਾਂ ਦੀ ਕੁੱਲ ਕੀਮਤ 8.6 ਅਰਬ ਡਾਲਰ ਹੈ।
ਯੂਐਸ ਸਕਿਓਰਿਟੀਜ਼ ਐਂਡ ਐਕਸਚੇਂਜ ਕਮਿਸ਼ਨ (ਐੱਸਈਸੀ) ਦੇ ਇੱਕ ਫਾਈਲਿੰਗ ‘ਚ ਦਿੱਤੀ ਜਾਣਕਾਰੀ ਦੇ ਅਨੁਸਾਰ, ਐਮਾਜ਼ਾਨ ਦੇ ਅਰਬਪਤੀ ਸੰਸਥਾਪਕ ਦੇ ਕੋਲ ਵੱਧ ਤੋਂ ਵੱਧ 50 ਮਿਲੀਅਨ ਸ਼ੇਅਰ ਵੇਚਣ ਦੀ ਯੋਜਨਾ ਸੀ। ਐੱਸਈਸੀ ਫਾਈਲਿੰਗ ਦੇ ਅਨੁਸਾਰ, ਜੈਫ ਬੇਜੋਸ ਐਮਾਜ਼ਾਨ ਸਟਾਕ ਦੇ ਲਗਭਗ ਇੱਕ ਅਰਬ ਸ਼ੇਅਰਾਂ ਦੇ ਮਾਲਕ ਹਨ। ਅਕਤੂਬਰ-ਦਸੰਬਰ ਤਿਮਾਹੀ ‘ਚ ਉਮੀਦ ਤੋਂ ਵੱਧ ਵਿਕਰੀ ਦਰਜ ਕਰਨ ਤੋਂ ਬਾਅਦ ਸ਼ੁੱਕਰਵਾਰ ਨੂੰ ਐਮਾਜ਼ਾਨ ਦੇ ਸ਼ੇਅਰਾਂ ਵਿੱਚ ਲਗਭਗ 8 ਫੀਸਦੀ ਦਾ ਉੱਛਾਲ ਦੇਖਣ ਨੂੰ ਮਿਲਿਆ।
ਕੰਪਨੀ ਦੀ ਨਵੀਂ ਸਾਲਾਨਾ ਰਿਪੋਰਟ ਦੇ ਅਨੁਸਾਰ, ਐਮਾਜ਼ਾਨ ਦੇ ਸ਼ੇਅਰਾਂ ਦੀ ਵਿਕਰੀ ਦੀ ਇਹ ਯੋਜਨਾ ਪਿਛਲੇ ਸਾਲ 8 ਨਵੰਬਰ ਨੂੰ ਸ਼ੁਰੂ ਹੋਈ ਸੀ, ਜੋ ਕਿ 31 ਜਨਵਰੀ, 2025 ਤੱਕ ਪੂਰੀ ਹੋ ਜਾਵੇਗੀ। 31 ਦਸੰਬਰ 2023 ਨੂੰ ਖਤਮ ਹੋਈ ਤਿਮਾਹੀ ਵਿੱਚ ਐਮਾਜ਼ਾਨ ਦੀ ਸ਼ੁੱਧ ਵਿਕਰੀ 14 ਫੀਸਦੀ ਵੱਧ ਕੇ 170 ਬਿਲੀਅਨ ਡਾਲਰ ਹੋ ਗਈ, ਜਦੋਂ ਕਿ 2022 ਦੀ ਚੌਥੀ ਤਿਮਾਹੀ ‘ਚ ਇਹ 149.2 ਬਿਲੀਅਨ ਡਾਲਰ ਸੀ।
ਜ਼ਿਕਰਯੋਗ ਹੈ ਕਿ ਜੈਫ ਬੇਜੋਸ ਨੇ 1994 ‘ਚ ਆਨਲਾਈਨ ਈ-ਕਾਮਰਸ ਕੰਪਨੀ ਐਮਾਜ਼ਾਨ ਦੀ ਸਥਾਪਨਾ ਕੀਤੀ ਸੀ। ਬਲੂਮਬਰਗ ਬਿਲੀਨੇਅਰਜ਼ ਇੰਡੈਕਸ ਦੇ ਅਨੁਸਾਰ, ਬੇਜੋਸ ਇਸ ਸਮੇਂ 185 ਬਿਲੀਅਨ ਡਾਲਰ ਦੀ ਕੁੱਲ ਜਾਇਦਾਦ ਦੇ ਨਾਲ ਦੁਨੀਆ ਦੇ ਤੀਜੇ ਸਭ ਤੋਂ ਅਮੀਰ ਵਿਅਕਤੀ ਹਨ।