ਨਵੀਂ ਦਿੱਲੀ, ਬਿਜ਼ਨੈੱਸ ਡੈਸਕ : ਜੇਕਰ ਤੁਸੀਂ ਬੈਂਕ ‘ਚ ਲੌਕਰ ਦੀ ਸਹੂਲਤ ਦੀ ਵਰਤੋਂ ਕਰਦੇ ਹੋ ਤਾਂ ਇਹ ਖਬਰ ਤੁਹਾਡੇ ਲਈ ਹੈ। ਤੁਹਾਨੂੰ 30 ਜੂਨ ਤਕ ਬੈਂਕ ਦੇ ਨਾਲ ਸੋਧੇ ਹੋਏ ਲੌਕਰ ਸਮਝੌਤੇ ‘ਤੇ ਦਸਤਖਤ ਕਰਨੇ ਪੈਣਗੇ। RBI ਵੱਲੋਂ ਬੈਂਕ ਲੌਕਰ ਦੇ ਨਵੇਂ ਨਿਯਮ ਜਾਰੀ ਕੀਤੇ ਜਾਣ ਤੋਂ ਬਾਅਦ ਸਾਰੇ ਬੈਂਕ ਗਾਹਕਾਂ ਨਾਲ ਕੀਤੇ ਲੌਕਰ ਸਮਝੌਤੇ ਨੂੰ ਰੀਨਿਊ ਕਰ ਰਹੇ ਹਨ।
ਭਾਰਤੀ ਰਿਜ਼ਰਵ ਬੈਂਕ ਨੇ ਬੈਂਕਾਂ ਨੂੰ ਨਵੇਂ ਨਿਯਮਾਂ ਅਨੁਸਾਰ 1 ਜਨਵਰੀ, 2023 ਤੋਂ ਗਾਹਕਾਂ ਨਾਲ ਸਾਰੇ ਲੌਕਰ ਸਮਝੌਤਿਆਂ ਨੂੰ ਸੋਧਣ ਲਈ ਕਿਹਾ ਸੀ। ਹਾਲਾਂਕਿ, 23 ਜਨਵਰੀ, 2023 ਨੂੰ ਜਾਰੀ ਪ੍ਰੈਸ ਰਿਲੀਜ਼ ਅਨੁਸਾਰ ਹੁਣ ਇਸਦੀ ਮਿਆਦ 31 ਦਸੰਬਰ, 2023 ਤਕ ਵਧਾ ਦਿੱਤੀ ਗਈ ਹੈ। ਇਸ ਤਹਿਤ 30 ਜੂਨ 2023 ਤਕ 50 ਫੀਸਦੀ ਕੰਮ, 30 ਸਤੰਬਰ 2023 ਤਕ 75 ਫੀਸਦੀ ਕੰਮ ਕੀਤਾ ਜਾਣਾ ਹੈ।SBI ਨੇ ਗਾਹਕਾਂ ਲਈ ਜਾਰੀ ਕੀਤਾ ਅਲਰਟ
ਐਸਬੀਆਈ ਵੱਲੋਂ ਨਵੇਂ ਸਮਝੌਤੇ ਬਾਰੇ ਗਾਹਕਾਂ ਨੂੰ ਸੂਚਿਤ ਕਰਦੇ ਹੋਏ ਇਕ ਟਵੀਟ ਕੀਤਾ ਗਿਆ ਕਿ ਬੈਂਕ ਨੇ ਗਾਹਕਾਂ ਦੇ ਅਧਿਕਾਰਾਂ ਨੂੰ ਸ਼ਾਮਲ ਕਰਦੇ ਹੋਏ ਆਪਣੇ ਲੌਕਰ ਸਮਝੌਤੇ ਨੂੰ ਸੋਧਿਆ ਹੈ। SBI ਦੀ ਲੌਕਰ ਸਹੂਲਤ ਪ੍ਰਾਪਤ ਕਰਨ ਵਾਲੇ ਸਾਰੇ ਗਾਹਕਾਂ ਨੂੰ ਬੇਨਤੀ ਕੀਤੀ ਜਾਂਦੀ ਹੈ ਕਿ ਉਹ ਆਪਣੀ ਸ਼ਾਖਾ ਵਿੱਚ ਜਾ ਕੇ ਇੱਕ ਨਵੇਂ ਲੌਕਰ ਸਮਝੌਤੇ ‘ਤੇ ਦਸਤਖਤ ਕਰਨ।
ਲੌਕਰ ਦੇ ਨਿਯਮਾਂ ‘ਚ ਕੀ ਹੋਇਆ ਬਦਲਾਅ ?
- ਆਰਬੀਆਈ ਦੇ ਦਿਸ਼ਾ-ਨਿਰਦੇਸ਼ਾਂ ਅਨੁਸਾਰ ਐਗਰੀਮੈਂਟ ਸਟੈਂਪ ਪੇਪਰ ‘ਤੇ ਹੋਣਾ ਚਾਹੀਦਾ ਹੈ। ਇਹ ਸਟੈਂਪ ਬੈਂਕ ਨੂੰ ਮੁਫਤ ਦੇਣੀ ਪਵੇਗਾ।
- ਜੇਕਰ ਸਰਕਾਰੀ ਏਜੰਸੀਆਂ ਲੌਕਰ ਨੂੰ ਅਟੈਚ ਕਰਨ ਜਾਂ ਜ਼ਬਤ ਕਰਨ ਲਈ ਬੈਂਕ ਕੋਲ ਪਹੁੰਚਦੀਆਂ ਹਨ ਤਾਂ ਇਸ ਬਾਰੇ ਗਾਹਕ ਨੂੰ ਈਮੇਲ ਤੇ SMS ਰਾਹੀਂ ਸੂਚਿਤ ਕੀਤਾ ਜਾਵੇਗਾ।
- ਅੱਗ, ਚੋਰੀ, ਸੰਨ੍ਹਮਾਰੀ, ਡਕੈਤੀ, ਇਮਾਰਤ ਡਿੱਗਣ, ਬੈਂਕ ਦੀ ਲਾਪਰਵਾਹੀ ਜਾਂ ਬੈਂਕ ਮੁਲਾਜ਼ਮਾਂ ਵੱਲੋਂ ਧੋਖਾਧੜੀ ਵਰਗੀਆਂ ਘਟਨਾਵਾਂ ਦੇ ਮਾਮਲੇ ਵਿੱਚ ਬੈਂਕ ਨੂੰ ਲੌਕਰ ਧਾਰਕ ਨੂੰ ਮੁਆਵਜ਼ਾ ਦੇਣਾ ਪੈਂਦਾ ਹੈ।
- RBI ਨੇ ਬੈਂਕਾਂ ਨੂੰ ਕਿਹਾ ਹੈ ਕਿ ਬੈਂਕ ਤਿੰਨ ਸਾਲ ਜਾਂ ਇਸ ਤੋਂ ਵੱਧ ਦੀ FD ‘ਤੇ ਲੌਕਰ ਚਾਰਜ ਨਹੀਂ ਲੈਣਗੇ।
