ਨਵੀਂ ਦਿੱਲੀ, ਆਨਲਾਈਨ ਡੈਸਕ : ਹਰਮਨਪ੍ਰੀਤ ਕੌਰ (Harmanpreet Kaur) ਦੀ ਕਪਤਾਨੀ ਹੇਠ ਭਾਰਤੀ ਟੀਮ ਰਾਸ਼ਟਰਮੰਡਲ ਖੇਡਾਂ 2022 ਦੇ ਮਹਿਲਾ ਟੀ-20 ਕਿ੍ਰਕਟ ਦੇ ਫਾਈਨਲ ਮੈਚ ਵਿਚ 9 ਦੌੜਾਂ ਨਾਲ ਹਾਰ ਗਈ। ਆਸਟ੍ਰੇਲੀਆ ਹੱਥੋਂ ਇਸ ਕਰੀਬੀ ਹਾਰ ਤੋਂ ਬਾਅਦ ਭਾਰਤ ਨੇ ਸੋਨ ਤਗਮਾ ਗੁਆ ਦਿੱਤਾ ਅਤੇ ਟੀਮ ਨੂੰ ਚਾਂਦੀ ਦਾ ਤਗਮਾ ਮਿਲਿਆ।
ਇਸ ਮੈਚ ’ਚ ਆਸਟ੍ਰੇਲੀਆ ਨੇ 20 ਓਵਰਾਂ ’ਚ 161 ਦੌੜਾਂ ਬਣਾਈਆਂ ਸਨ ਅਤੇ ਜਵਾਬ ’ਚ ਭਾਰਤੀ ਮਹਿਲਾ ਟੀਮ 152 ਦੌੜਾਂ ’ਤੇ ਆਲ ਆਊਟ ਹੋ ਗਈ ਸੀ। ਭਾਰਤੀ ਮਹਿਲਾ ਟੀਮ ਨੇ ਇਸ ਮੈਚ ’ਚ 34 ਦੌੜਾਂ ’ਤੇ ਆਪਣੀਆਂ 7 ਵਿਕਟਾਂ ਗੁਆ ਦਿੱਤੀਆਂ ਅਤੇ ਹਾਰ ਦਾ ਸਾਹਮਣਾ ਕਰਨਾ ਪਿਆ।
ਵਿਰਾਟ ਕੋਹਲੀ ਦਾ ਤੋੜਿਆ ਰਿਕਾਰਡ
ਆਸਟ੍ਰੇਲੀਆ ਖ਼ਿਲਾਫ਼ ਫਾਈਨਲ ਮੈਚ ਵਿਚ ਟੀਮ ਦੀ ਕਪਤਾਨ ਹਰਮਨਪ੍ਰੀਤ ਕੌਰ (Harmanpreet Kaur) ਨੇ ਕਪਤਾਨੀ ਦੀ ਪਾਰੀ ਖੇਡਦਿਆਂ 65 ਦੌੜਾਂ ਬਣਾਈਆਂ। ਉਸ ਨੇ ਇਹ ਦੌੜਾਂ 43 ਗੇਂਦਾਂ ਵਿਚ 2 ਛੱਕਿਆਂ ਤੇ 7 ਚੌਕਿਆਂ ਦੀ ਮਦਦ ਨਾਲ ਬਣਾਈਆਂ। ਹਰਮਨਪ੍ਰੀਤ ਕੌਰ ਨੇ ਆਪਣੀ ਪਾਰੀ ਦੇ ਦਮ ’ਤੇ ਇਕ ਵੱਡਾ ਰਿਕਾਰਡ ਬਣਾਇਆ ਤੇ ਵਿਰਾਟ ਕੋਹਲੀ ਨੂੰ ਵੀ ਪਿੱਛੇ ਛੱਡ ਦਿੱਤਾ। ਹਰਮਨਪ੍ਰੀਤ ਕੌਰ ਆਪਣੀ 65 ਦੌੜਾਂ ਦੀ ਪਾਰੀ ਤੋਂ ਬਾਅਦ ਹੁਣ ਟੀ-20 ਅੰਤਰਰਾਸ਼ਟਰੀ ਕਿ੍ਰਕਟ ਵਿਚ ਬਤੌਰ ਕਪਤਾਨ ਭਾਰਤ ਲਈ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲੀ ਖਿਡਾਰਨ ਬਣ ਗਈ ਹੈ।
ਹਰਮਨਪ੍ਰੀਤ ਦੇ ਨਾਂ ’ਤੇ ਬਤੌਰ ਕਪਤਾਨ ਟੀ-20 ’ਚ 1618 ਦੌੜਾਂ ਹਨ, ਜੋ ਉਸ ਨੇ 74 ਮੈਚਾਂ ’ਚ ਬਣਾਈਆਂ ਹਨ, ਜਦੋਂਕਿ ਵਿਰਾਟ ਕੋਹਲੀ ਨੇ ਬਤੌਰ ਕਪਤਾਨ ਟੀ-20 ਅੰਤਰਰਾਸ਼ਟਰੀ ਕਿ੍ਰਕਟ ’ਚ 1570 ਦੌੜਾਂ ਬਣਾਈਆਂ ਹਨ। ਵਿਰਾਟ ਕੋਹਲੀ ਦਾ ਇਹ ਰਿਕਾਰਡ ਹੁਣ ਟੁੱਟ ਗਿਆ ਹੈ ਅਤੇ ਉਹ ਦੂਜੇ ਨੰਬਰ ’ਤੇ ਖਿਸਕ ਗਏ ਹਨ। ਇਸ ਦੇ ਨਾਲ ਹੀ ਹਿਟਮੈਨ ਯਾਨੀ ਰੋਹਿਤ ਸ਼ਰਮਾ 1161 ਦੌੜਾਂ ਨਾਲ ਤੀਜੇ ਨੰਬਰ ’ਤੇ ਮੌਜੂਦ ਹਨ।
ਟੀ-20 ’ਚ ਬਤੌਰ ਭਾਰਤੀ ਕਪਤਾਨ ਸਭ ਤੋਂ ਵੱਧ ਦੌੜਾਂ
1618 ਦੌੜਾਂ – ਹਰਮਨਪ੍ਰੀਤ ਕੌਰ
1570 ਦੌੜਾਂ – ਵਿਰਾਟ ਕੋਹਲੀ
1161 ਦੌੜਾਂ – ਰੋਹਿਤ ਸ਼ਰਮਾ
1112 ਦੌੜਾਂ – ਮਹਿੰਦਰ ਸਿੰਘ ਧੋਨੀ
