ਕੈਨੇਡਾ ‘ਚ 890 ਤੋਂ ਪਾਰ ਹੋਏ ਮੌਂਕੀਪੌਕਸ ਦੇ ਕੇਸ

ਇਨ੍ਹਾਂ ਵਿੱਚ ਸਭ ਤੋਂ ਵੱਧ ਇਕੱਲੇ ਉਨਟਾਰੀਓ ਸੂਬੇ ਦੇ 423 ਮਾਮਲੇ ਸ਼ਾਮਲ ਹਨ।

ਪਬਲਿਕ ਹੈਲਥ ਏਜੰਸੀ ਆਫ਼ ਕੈਨੇਡਾ ਮੁਤਾਬਕ 3 ਅਗਸਤ ਤੱਕ ਮੌਂਕੀਪੌਕਸ ਦੇ ਦੇਸ਼ ਭਰ ਵਿੱਚ ਕੁੱਲ 890 ਮਾਮਲੇ ਸਾਹਮਣੇ ਆਏ। ਇਨ੍ਹਾਂ ਵਿੱਚ ਉਨਟਾਰੀਓ ਦੇ ਸਭ ਤੋਂ ਵੱਧ 423, ਕਿਊਬੈਕ ਦੇ 373, ਬ੍ਰਿਟਿਸ਼ ਕੋਲੰਬੀਆ ਦੇ 78, ਅਲਬਰਟਾ ਦੇ 13, ਸਸਕੈਚੇਵਨ ਦੇ 2 ਅਤੇ ਕੇਂਦਰ ਸ਼ਾਸਿਤ ਪ੍ਰਦੇਸ਼ ਯੂਕੋਨ ਦਾ 1 ਕੇਸ ਸ਼ਾਮਲ ਹੈ। ਮੌਂਕੀਪੌਕਸ ਦੇ ਕੇਸਾਂ ਦੀ ਗਿਣਤੀ ਦੇ ਮਾਮਲੇ ਵਿੱਚ ਉਨਟਾਰੀਓ ਸੂਬੇ ਨੇ ਕਿਊਬੈਕ ਨੂੰ ਵੀ ਪਿੱਛੇ ਛੱਡ ਦਿੱਤਾ ਹੈ। ਕਿਉਂਕਿ ਪਹਿਲਾਂ ਕਿਊਬੈਕ ਵਿੱਚ ਸਭ ਤੋਂ ਵੱਧ ਕੇਸ ਮਿਲ ਰਹੇ ਸੀ, ਪਰ ਹੁਣ ਉਨਟਾਰੀਓ ਉਸ ਤੋਂ ਵੀ ਅੱਗੇ ਟੱਪ ਗਿਆ।

ਪਬਲਿਕ ਹੈਲਥ ਏਜੰਸੀ ਮੁਤਾਬਕ ਮੌਂਕੀਪੌਕਸ, ਸਮਾਲਪੌਕਸ ਦੀ ਤਰ੍ਹਾਂ ਇੱਕ ਵਾਇਰਲ ਬਿਮਾਰੀ ਹੈ। ਏਜੰਸੀ ਦਾ ਕਹਿਣਾ ਹੈ ਕਿ ਉਹ ਕੈਨੇਡਾ ਵਿੱਚ ਇਸ ਰੋਗ ਨੂੰ ਫੈਲਣ ਤੋਂ ਰੋਕਣ ਲਈ ਸੂਬਾਈ, ਟੈਰੀਟਰੀਜ਼ ਅਤੇ ਕੌਮਾਂਤਰੀ ਭਾਈਵਾਲਾਂ ਨਾਲ ਮਿਲ ਕੇ ਕੰਮ ਕਰ ਰਹੀ ਹੈ।