ਬਰੈਂਪਟਨ : ਉੁਨਟਾਰੀਓ ਦੇ ਸ਼ਹਿਰ ਬਰੈਂਪਟਨ ‘ਚ ਮਕਾਨ ਖਰੀਦਣ ਦੀ ਸੋਚ ਰਹੇ ਲੋਕਾਂ ਨੂੰ ਆਪਣੀ ਜੇਬ੍ਹ ਕਾਫ਼ੀ ਢਿੱਲੀ ਕਰਨੀ ਪਏਗੀ, ਕਿਉਂਕਿ ਇੱਥੇ ਮਕਾਨਾਂ ਦੀਆਂ ਕੀਮਤਾਂ ਅਸਮਾਨ ਛੁੰਹਦੀਆਂ ਜਾ ਰਹੀਆਂ ਹਨ।
ਹਾਲ ਹੀ ਵਿੱਚ ਜਾਰੀ ਹੋਏ ਅੰਕੜਿਆਂ ਮੁਤਾਬਕ ਬਰੈਂਪਟਨ ‘ਚ ਅਗਸਤ-2021 ਵਿੱਚ ਮਕਾਨਾਂ ਦੀਆਂ ਕੀਮਤਾਂ ਔਸਤਨ 24 ਫੀਸਦੀ ਵਧ ਕੇ 10 ਲੱਖ 60 ਹਜ਼ਾਰ 277 ਡਾਲਰ ‘ਤੇ ਪਹੁੰਚ ਗਈਆਂ ਹਨ। ਬਰੈਂਪਟਨ ਹੀ ਨਹੀਂ, ਸਗੋਂ ਗਰੇਟਰ ਟੋਰਾਂਟੋ ਏਰੀਆ (ਜੀਟੀਏ) ਦੇ ਹੋਰਨਾਂ ਹਿੱਸਿਆਂ ਵਿੱਚ ਵੀ ਮਕਾਨਾਂ ਦੀ ਵਿਕਰੀ ‘ਚ ਗਿਰਾਵਟ ਤੇ ਅਸਮਾਨ ਛੁੰਹਦੀਆਂ ਕੀਮਤਾਂ ਵੇਖਣ ਨੂੰ ਮਿਲ ਰਹੀਆਂ ਹਨ।
ਟੋਰਾਂਟੋ ਰੀਜਨਲ ਰੀਅਲ ਅਸਟੇਟ ਬੋਰਡ (ਟੀਆਰਆਰਈਬੀ) ਨੇ ਕਿਹਾ ਕਿ ਇਸ ਸਾਲ ਦੀ ਸ਼ੁਰੂਆਤ ਦੇ ਮੁਕਾਬਲੇ ਅਗਸਤ ਮਹੀਨੇ ਵਿੱਚ ਮਕਾਨਾਂ ਦੀ ਵਿਕਰੀ ‘ਚ ਭਾਰੀ ਗਿਰਾਵਟ ਆਈ ਹੈ, ਜਦਕਿ ਮਕਾਨ ਦੀਆਂ ਕੀਮਤਾਂ ਤੇਜ਼ੀ ਨਾਲ ਵਧੀਆਂ ਹਨ।
ਟੋਰਾਂਟੋ ਰੀਜਨਲ ਰੀਅਲ ਅਸਟੇਟ ਬੋਰਡ ਨੇ ਪਿਛਲੇ ਹਫ਼ਤੇ ਐਲਾਨ ਕੀਤਾ ਸੀ ਕਿ ਟੋਰਾਂਟੋ ਅਤੇ ਜੀਟੀਏ ਵਿੱਚ ਅਗਸਤ ਮਹੀਨੇ ‘ਚ 8596 ਮਕਾਨਾਂ ਦੀ ਵਿਕਰੀ ਹੋਈ, ਜੋ ਕਿ ਪਿਛਲੇ ਸਾਲ ਇਸੇ ਮਹੀਨੇ ਹੋਈ 10 ਹਜ਼ਾਰ 738 ਮਕਾਨਾਂ ਦੀ ਵਿਕਰੀ ਤੋਂ 19.9 ਫੀਸਦੀ ਘੱਟ ਹੈ। ਇਸ ਤੋਂ ਇਲਾਵਾ ਬੀਤੇ ਜੁਲਾਈ ਮਹੀਨੇ ਵਿੱਚ ਸੇਲ ਹੋਏ 9368 ਮਕਾਨਾਂ ਦੀ ਗਿਣਤੀ ਤੋਂ ਵੀ ਇਹ ਅੰਕੜੇ 8 ਫੀਸਦੀ ਘੱਟ ਹਨ।
ਜੀਟੀਏ ਵਿੱਚ ਮਕਾਨਾਂ ਦੀ ਵਿਕਰੀ ਪਿਛਲੇ ਸਾਲ ਅਗਸਤ ਮਹੀਨੇ ‘ਚ ਵਿਕੇ 18 ਹਜ਼ਾਰ 599 ਤੋਂ 43 ਫੀਸਦੀ ਘਟ ਕੇ ਮੌਜੂਦਾ ਸਮੇਂ 10 ਹਜ਼ਾਰ 609 ‘ਤੇ ਪਹੁੰਚ ਗਈ ਹੈ। ਇਸ ਤੋਂ ਇਲਾਵਾ ਬੀਤੇ ਜੁਲਾਈ ਮਹੀਨੇ ਵਿੱਚ ਵਿਕੇ 12 ਹਜ਼ਾਰ 551 ਮਕਾਨਾਂ ਨਾਲੋਂ ਵੀ ਅਗਸਤ ‘ਚ 15 ਫੀਸਦੀ ਗਿਰਾਵਟ ਦਰਜ ਕੀਤੀ ਗਈ।
ਘੱਟ ਵਿਆਜ਼ ਦਰਾਂ ਤੇ ਦੂਰ-ਦੁਰਾਡੇ ਕੰਮਕਾਜੀ ਪ੍ਰਬੰਧਾਂ ਕਾਰਨ ਮਕਾਨਾਂ ਦੀਆਂ ਕੀਮਤਾਂ ਲਗਾਤਾਰ ਵਧ ਰਹੀਆਂ ਹਨ, ਜਿਸ ਕਾਰਨ ਲੋਕ ਵੱਡੇ ਸ਼ਹਿਰਾਂ ਤੋਂ ਬਾਹਰ ਮਕਾਨ ਲੱਭਣ ਦਾ ਰਾਹ ਚੁਣ ਰਹੇ ਹਨ। ਇਸ ਤੋਂ ਇਲਾਵਾ ਸੰਭਾਵਿਤ ਮਕਾਨ ਖਰੀਦਦਾਰ ਚੱਲ ਰਹੇ ਲੌਕਡਾਊਨ ਤੇ ਕਾਰੋਬਾਰ ਬੰਦ ਹੋਣ ਕਾਰਨ ਵਧੇਰੇ ਬਚਤ ਕਰਨ ਦੇ ਯੋਗ ਵੀ ਹੋਏ ਹਨ, ਕਿਉਂਕਿ ਇਸ ਦੌਰਾਨ ਉਨ੍ਹਾਂ ਨੇ ਮਨੋਰੰਜਨ ‘ਤੇ ਵੀ ਘਟ ਖਰਚ ਕੀਤੀ।
ਟੀਆਰਆਰਈਬੀ ਮੁਤਾਬਕ ਜੀਟੀਏ ਵਿੱਚ ਅਗਸਤ ਮਹੀਨੇ ਦੌਰਾਨ ਇੱਕ ਮਕਾਨ ਦੀ ਕੀਮਤ ਔਸਤਨ 10 ਲੱਖ 70 ਹਜ਼ਾਰ 911 ਡਾਲਰ ‘ਤੇ ਪਹੁੰਚ ਗਈ ਹੈ, ਜਦਕਿ ਪਿਛਲੇ ਸਾਲ ਇਸੇ ਸਮੇਂ ਦੌਰਾਨ ਇਹ ਅੰਕੜਾ 9 ਲੱਖ 51 ਹਜ਼ਾਰ 219 ਡਾਲਰ ਸੀ ਅਤੇ ਇੱਕ ਮਹੀਨਾ ਪਹਿਲਾਂ ਭਾਵ ਜੁਲਾਈ ਵਿੱਚ ਇਹ ਅੰਕੜਾ 10 ਲੱਖ 62 ਹਜ਼ਾਰ 256 ਡਾਲਰ ਸੀ।
ਬਰੈਂਪਟਨ ‘ਚ ਮਕਾਨ ਖਰੀਦਣਾ ਹੋਇਆ ਮਹਿੰਗਾ
Recent Comments
Hello world!
on