- ਅਰਬਾਂ ਡਾਲਰ ਖ਼ਰਚ ਕਰਨ ਦਾ ਐਲਾਨ, 10 ਲੱਖ ਨੌਕਰੀਆਂ ਦਾ ਵਾਅਦਾ
ਟੋਰਾਂਟੋ, 17 ਅਗਸਤ : ਕੰਜ਼ਰਵੇਟਿਵ ਪਾਰਟੀ ਨੇ ਆਪਣਾ ਚੋਣ ਮਨੋਰਥ ਪੱਤਰ ਜਾਰੀ ਕਰਦਿਆਂ ਕੈਨੇਡਾ ਦੀ ਆਰਥਿਕਤਾ ਨੂੰ ਹੁਲਾਰਾ ਦੇਣ ਲਈ ਅਰਬਾਂ ਡਾਲਰ ਖ਼ਰਚ ਕਰਨ ਦਾ ਵਾਅਦਾ ਕੀਤਾ ਹੈ।
ਪਾਰਟੀ ਦੇ ਆਗੂ ਐਰਿਨ ਓ ਟੂਲ ਨੇ ਕਿਹਾ ਕਿ ਕੰਜ਼ਰਵੇਟਿਵ ਪਾਰਟੀ ਦੇ ਸੱਤਾ ਵਿਚ ਆਉਣ ’ਤੇ 10 ਲੱਖ ਨੌਕਰੀਆਂ ਪੈਦਾ ਕੀਤੀਆਂ ਜਾਣਗੀਆਂ ਅਤੇ 10 ਸਾਲ ਦੇ ਅੰਦਰ ਬਜਟ ਘਾਟਾ ਖ਼ਤਮ ਕਰ ਦਿਤਾ ਜਾਵੇਗਾ ਜੋ ਮੌਜੂਦਾ ਵਿੱਤੀ ਵਰ੍ਹੇ ਦੌਰਾਨ 382 ਅਰਬ ਡਾਲਰ ਰਹਿਣ ਦਾ ਅਨੁਮਾਨ ਹੈ।
160 ਸਫ਼ਿਆਂ ਦੇ ਇਲੈਕਸ਼ਨ ਪਲੈਟਫ਼ਾਰਮ ਦਾ ਜ਼ਿਕਰ ਕਰਦਿਆਂ ਐਰਿਨ ਓ ਟੂਲ ਨੇ ਕਿਹਾ ਕਿ ਸੱਤਾ ਵਿਚ ਆਉਣ ’ਤੇ ਲਿਬਰਲ ਪਾਰਟੀ ਦਾ ਚਾਈਲਡ ਕੇਅਰ ਪ੍ਰੋਗਰਾਮ ਖ਼ਤਮ ਕਰ ਦਿਤਾ ਜਾਵੇਗਾ ਅਤੇ ਇਸ ਦੀ ਥਾਂ ਮਾਪਿਆਂ ਨੂੰ ਨਕਦ ਸਹਾਇਤਾ ਦਿਤੀ ਜਾਵੇਗੀ।
ਲਿਬਰਲ ਪਾਰਟੀ ਚਾਈਲਡ ਕੇਅਰ ਦਾ ਖ਼ਰਚਾ 10 ਡਾਲਰ ਰੋਜ਼ਾਨਾ ਤੱਕ ਘਟਾਉਣ ਦੀ ਯੋਜਨਾ ਲਾਗੂ ਕਰ ਰਹੀ ਹੈ ਪਰ ਕੰਜ਼ਰਵੇਟਿਵ ਪਾਰਟੀ ਬੱਚਿਆਂ ਦੀ ਸੰਭਾਲ ਉਪਰ ਹੋਣ ਵਾਲੇ ਖਰਚੇ ਦਾ 75 ਫ਼ੀ ਸਦੀ ਤੱਕ ਮਾਪਿਆਂ ਦੀ ਜੇਬ ਵਿਚ ਪਾਉਣ ਦਾ ਹੋਕਾ ਦੇ ਰਹੀ ਹੈ।