ਨੌਰਥ ਸਾਊਂਡ/ਐਂਟੀਗੁਆ (ਭਾਸ਼ਾ)-ਵੈਸਟਇੰਡੀਜ਼ ਦੇ ਐਂਟੀਗੁਆ ‘ਚ ਖੇਡੇ ਜਾ ਰਹੇ ਅੰਡਰ-19 ਵਿਸ਼ਵ ਕੱਪ ਦੇ ਫਾਈਨਲ ‘ਚ ਇੰਗਲੈਂਡ ਨੇ ਭਾਰਤ ਦੇ ਸਾਹਮਣੇ 190 ਦੌੜਾਂ ਦਾ ਟੀਚਾ ਰੱਖਿਆ ਹੈ। ਇੰਗਲੈਂਡ ਦੀ ਪਾਰੀ 189 ‘ਤੇ ਸਮਿਟ ਗਈ। ਤੇਜ਼ ਗੇਂਦਬਾਜ਼ ਰਾਜ ਬਾਵਾ ਅਤੇ ਰਵੀ ਕੁਮਾਰ ਨੇ ਘਾਤਕ ਗੇਂਦਬਾਜ਼ੀ ਕੀਤੀ। ਰਾਜ ਨੇ ਪੰਜ ਅਤੇ ਰਵੀ ਨੇ ਚਾਰ ਵਿਕਟਾਂ ਲਈਆਂ। ਇਸ ਤੋਂ ਇਲਾਵਾ ਕੌਸ਼ਲ ਤਾਂਬੇ ਨੂੰ ਇਕ ਵਿਕਟ ਮਿਲੀ। ਇੰਗਲੈਂਡ ਵੱਲੋਂ ਜੈਮਸ ਰਿਯੂ ਨੇ ਸਭ ਤੋਂ ਜ਼ਿਆਦਾ 95 ਦੌੜਾਂ ਦੀ ਪਾਰੀ ਖੇਡੀ।
ਇੰਗਲੈਂਡ ਅਤੇ ਭਾਰਤ ਦੋਵੇਂ ਬਿਨਾਂ ਕੋਈ ਮੈਚ ਗੁਆਏ ਫਾਈਨਲ ’ਚ ਪਹੁੰਚੇ ਹਨ। ਇੰਗਲੈਂਡ ਦੀ ਟੀਮ ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਲਈ ਉੱਤਰੀ। ਉਸ ਦੀ ਸ਼ੁਰੂਆਤ ਬਹੁਤ ਹੀ ਖ਼ਰਾਬ ਰਹੀ। ਆਪਣੇ ਦੂਜੇ ਹੀ ਓਵਰ ਵਿਚ ਰਵੀ ਕੁਮਾਰ ਨੇ ਇੰਗਲੈਂਡ ਦੇ ਕਪਤਾਨ ਟਾਮ ਪ੍ਰੈਸਟ ਨੂੰ ਜ਼ੀਰੋ ’ਤੇ ਆਊਟ ਕਰਕੇ ਭਾਰਤ ਨੂੰ ਪਹਿਲੀ ਸਫ਼ਲਤਾ ਦਿਵਾਈ। ਇਸ ਤੋਂ ਬਾਅਦ ਬਾਵਾ ਨੇ ਖ਼ਤਰਨਾਕ ਨਜ਼ਰ ਆ ਰਹੇ ਜਾਰਜ ਥਾਮਸ ਨੂੰ ਪੈਵੇਲੀਅਨ ਭੇਜਿਆ। ਉਸ ਨੇ 30 ਗੇਂਦਾਂ ’ਤੇ 4 ਚੌਕਿਆਂ ਤੇ 1 ਛੱਕੇ ਦੀ ਮਦਦ ਨਾਲ 27 ਦੌੜਾਂ ਬਣਾਈਆਂ।
ਰਾਜ ਬਾਵਾ ਨੇ ਇਸ ਤੋਂ ਬਾਅਦ ਵਿਲੀਅਮ ਨੂੰ ਸਿਰਫ 4 ਦੌੜਾਂ ’ਤੇ ਪੈਵੇਲੀਅਨ ਦਾ ਰਸਤਾ ਦਿਖਾਇਆ। ਅਗਲੀ ਹੀ ਗੇਂਦ ’ਤੇ ਉਨ੍ਹਾਂ ਨੇ ਜਾਰਜ ਬੈੱਲ ਨੂੰ ਆਊਟ ਕਰ ਦਿੱਤਾ। ਰਾਜ ਬਾਵਾ ਨੇ ਆਪਣੀ ਖ਼ਤਰਨਾਕ ਗੇਂਦਬਾਜ਼ੀ ਜਾਰੀ ਰੱਖੀ ਤੇ ਰਹਾਨ ਅਹਿਮਦ ਨੂੰ ਤਾਂਬੇ ਹੱਥੋਂ ਆਊਟ ਕਰਾ ਕੇ ਚੌਥਾ ਵਿਕਟ ਹਾਸਲ ਕੀਤਾ। ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਲਈ ਆਈ ਇੰਗਲੈਂਡ ਦੀ ਟੀਮ ਦੀ ਸ਼ੁਰੂਆਤ ਚੰਗੀ ਨਹੀਂ ਰਹੀ ਤੇ ਟੀਮ ਨੂੰ ਸਲਾਮੀ ਬੱਲੇਬਾਜ਼ ਜੈਕਬ ਬੈਥਲ ਦੇ ਤੌਰ ’ਤੇ ਪਹਿਲਾ ਝਟਕਾ ਲੱਗਾ। ਬੈਥਲ ਨੂੰ ਰਵੀ ਕੁਮਾਰ ਨੇ 2 ਦੌੜਾਂ ’ਤੇ ਆਊਟ ਕਰਕੇ ਪੈਵੇਲੀਅਨ ਦਾ ਰਸਤਾ ਦਿਖਾਇਆ। ਇੰਗਲੈਂਡ ਨੂੰ 7ਵਾਂ ਝਟਕਾ ਤਾਂਬੇ ਨੇ ਐਲਕਸ ਹਾਰਟਨ ਨੂੰ ਆਊਟ ਕਰਕੇ ਦਿੱਤਾ।